Amo 6 | NdeIBE | STEP | Maye kini lina elingakhathaliyo eZiyoni, lakini elizizwa livikelekile eNtabeni iSamariya, lina madoda adumileyo esizwe sokuqala, abantu bako-Israyeli abaya kuso!

Amos 6

Maye kulabo abangakhathaliyo

1 Maye kini lina elingakhathaliyo eZiyoni, lakini elizizwa livikelekile eNtabeni iSamariya, lina madoda adumileyo esizwe sokuqala, abantu bako-Israyeli abaya kuso!

2 Yanini eKhaline liyikhangele; lisuka lapho yanini eHamathi enkulu, libeselisehlela eGathi eseFilistiya. Bangcono kulemibuso yenu emibili na? Ilizwe labo likhulu kulelenu na?

3 Lisusa usuku olubi lisondeze eduze ukubusa ngodlakela.

4 Lilala emibhedeni eyenziwa ngezimpondo zendlovu licambalale phezu kwemibheda yenu yokuphumulela. Lidla inyama yezimvu zekhethelo leyamathole anonisiweyo.

5 Lihweba amachacho njengoDavida kodwa engamachacho ezaba.

6 Linatha iwayini ligcwele izinqayi, ligcobe ngamagcobo amahle, kodwa kalikhathazeki ngokuchitheka kukaJosefa.

7 Ngakho-ke lizakuba ngabanye bakuqala ekuthunjweni; ukuzitika kwenu lokuhleka kuzaphela.

Inkosi iyakwenyanya ukuzigqaja kuka-Israyeli

8 UJehova Wobukhosi uzifungele yena ngokwakhe – uJehova uNkulunkulu uSomandla uthi: “Ngiyakwenyanya ukuzigqaja kukaJakhobe njalo ngiyazizonda izinqaba zakhe; ngizalinikela idolobho lakho konke okukulo.”

9 Uma amadoda alitshumi esele endlini eyodwa, lawo azakufa. 10 Njalo uma isihlobo okumele sitshise izidumbu sifika ukuba sizisuse kuleyondlu besesibuza loba ngubani oyabe elokhu ecatshile khonapho, sithi, “Kulomunye olawe na? Yena athi, “Hatshi,” lapho-ke uzakuthi, “Thula! Akumelanga sithinte ibizo likaJehova.”

11 Ngoba uJehova usekhuphe umlayo, njalo uzaphahlaza indlukazi ibe yizihlephu kuthi indlu encinyane ibe yizicucu.

12 Amabhiza ayagijima emadwaleni angamawa na? Umuntu uyalima khonapho ngenkabi na? Kodwa lina liphendule ukulunga kwaba yitshefu lesithelo sokulunga saba yibuhlungu –

13 lina elithokoziswa yikunqotshwa kweLo-Debhari beselisithi, “IKharinayimi kasiyithumbanga ngamandla ethu na?”

14 Ngoba uJehova uNkulunkulu uSomandla uthi, “Ngizakuvusela isizwe, wena ndlu ka-Israyeli, esizakucindezela indawo yonke kusukela eLebho Hamathi kusiyafika esigodini sase-Arabha.”